Samitin i IV i Diasporës u zhvillua në Tiranë nga data 13 prill deri më 15 prill, ku morën pjesë shqiptarë të emigruar nga 38 vende të botës. Samitet e Diasporës lindën si një nevojë për të thelluar bashkëpunimin dhe përfshirjen aktive të mërgatës shqiptare në jetën shoqërore dhe institucionale të vendit, si dhe për të nxitur rikthimin e emigrantëve shqiptarë në vendin e tyre.
Tradita e samiteve nisi në mandatin e parë të Kryeministrit Edi Rama, në vitin 2016 dhe që prej asaj kohe në Tiranë janë mbledhur katër herë shqiptarët nga çdo cep i botës, pra një samit për çdo mandat qeverisës. Këtë herë ky aktivitet madhor nuk kaloi pa tensione dhe debate në panelet e tij.
Një prej zërave më kritikë ishte ai i Eva Baçit, një shqiptare që jeton dhe punon në Bolonja, e cila ngriti shqetësimin se, pavarësisht dëshirës për t’u kthyer dhe kontribuar në Shqipëri, mungojnë hapësirat reale për përfshirje. Në këtë panel, ku ishin të pranishëm Niko Peleshi dhe Taulant Balla, ajo u shpreh se organizime të tilla shpesh mbeten në nivel deklarativ dhe nuk reflektojnë zërin e vërtetë të diasporës.
Juristja Baçi kritikoi faktin se pjesëmarrësit nga diaspora nuk janë pjesë aktive në këto panele, duke theksuar se ata janë “aktorët kryesorë” të këtij samiti dhe jo thjesht dëgjues të fjalimeve politike. Sipas saj, shumë profesionistë shqiptarë jashtë vendit, pavarësisht kualifikimeve të larta, ndihen të papërfaqësuar dhe të papërkrahur nga institucionet në Shqipëri. Diaspora, sipas saj, shpesh trajtohet më shumë si statistikë sesa si potencial real për zhvillimin e vendit.
Të nesërmen e këtij debati, juristja Baçi dhe një grup përfaqësuesish nga diaspora u ftuan posaçërisht nga deputeti Balla në një takim për të biseduar nga afër mbi shqetësimet e emigrantëve shqiptarë, të cilët me mundin e tyre kanë arritur të krijojnë edhe elitën e tyre në vendet ku jetojnë dhe punojnë.
Ndërhyrja e Baçit u bë kryefjala e mediave klasike dhe atyre sociale, duke marrë gjithë vëmendjen e publikut këto ditë. Po kështu, në datën 14 prill, një tjetër deklaratë kontraditore erdhi nga shqiptarët e Selanikut.
