Teatri dhe arti shqiptar janë në zi për ndarjen nga jeta të aktorit të njohur Zhani Ziçishti, i cili për dekada ishte një prej figurave më përfaqësuese të skenës në Korçë. Lajmi u konfirmua nga Qendra e Artit dhe Kulturës Korçë, që vlerësoi kontributin e tij të vyer në teatër dhe film.
Me një karrierë të gjatë dhe të pasur, Ziçishti la gjurmë përmes roleve që u kthyen në pika referimi për publikun dhe kolegët. Interpretimet e tij u dalluan për ndjeshmëri artistike dhe përkushtim profesional, duke e bërë një nga aktorët më të respektuar të brezit të tij.
Homazhet do të zhvillohen më 26 shkurt, nga ora 09:30 deri në 10:30, në ambientet e teatrit të qytetit, ku familjarë, miq, kolegë dhe artdashës do t’i japin nderimet e fundit një artisti që la pas një trashëgimi të çmuar kulturore.
