Në Mynih, ku jeton një komunitet i madh shqiptar, është themeluar në mars të vitit 2025 Shkolla Shqiptare e Vallëzimit “SHOTA”, një iniciativë që synon t’i afrojë të rinjtë me traditat shqiptare përmes vallëzimit dhe artit.
Shkolla është themeluar dhe drejtohet nga Mustafë Avdiu, i cili gjatë viteve 1983–1995 ishte valltar në Ansamblin Shtetëror të Këngëve dhe Valleve “Shota” në Prishtinë. Përvoja e tij artistike dhe përkushtimi ndaj vallëzimit tradicional e kanë shtyrë të vazhdojë këtë rrugë edhe në diasporë.
Në këtë intervistë për arbinfoculture.com, ai flet për themelimin e shkollës, punën me të rinjtë shqiptarë në Mynih dhe rëndësinë e transmetimit të traditave tek brezat e rinj që jetojnë larg vendit të origjinës.
- Kur është themeluar shkolla juaj e vallëzimit dhe sa të rinj shqiptarë e ndjekin sot? Cili ishte motivimi kryesor për ta themeluar këtu në Mynih?
Shkolla shqiptare e vallëzimit “Shota” në Mynih është themeluar në mars të vitit 2025. Aktualisht shkolla numëron rreth 30 anëtarë. Shumica e tyre janë të lindur në Gjermani, por të gjithë kanë prejardhje shqiptare nga Kosova, Shqipëria, Mali i Zi, Maqedonia e Veriut, Lugina e Preshevës, si dhe kemi edhe një valltare me prejardhje arbëreshe nga Italia.
Duke qenë se jetoj në Mynih dhe di që këtu jetojnë mbi 30.000 shqiptarë, pashë se ekziston një interesim i madh nga të rinjtë për të mësuar vallëzimin, këndimin dhe për t’i kultivuar traditat tona shqiptare. Ky ishte edhe motivimi kryesor për themelimin e shkollës.
2. Në çfarë mënyre aktiviteti juaj i ndihmon të rinjtë të ruajnë identitetin dhe kulturën shqiptare?
Unë përpiqem t’i ndihmoj të rinjtë duke ua transmetuar përvojën time profesionale, duke ua mësuar hapat bazë të vallëzimit, si dhe valle të ndryshme në koreografi tradicionale shqiptare. Përmes këtij angazhimi, ata jo vetëm që mësojnë vallet tona, por edhe forcojnë lidhjen me kulturën dhe identitetin e tyre kombëtar.
3. Cilin gjuhë përdorni gjatë provave dhe aktiviteteve?
Gjatë provave përdorim kryesisht gjuhën shqipe, ndërsa në raste të caktuara edhe gjuhën gjermane, sidomos kur është e nevojshme për sqarime shtesë. Të rinjtë e shkollës tregojnë përkushtim të madh për të mësuar dhe për të ruajtur traditat tona të këngës dhe valleve shqiptare.
4. A bashkëpunoni me shoqata të tjera dhe a tregojnë të rinjtë interes për traditat?
Po, ne bashkëpunojmë me disa ansamble në Gjermani dhe Zvicër, si Ansambli “Dardanët” në Dyseldorf, Ansambli „URA“ Zvicër, si dhe me shkollën e vallëzimit “Shota” në Zvicër. Të rinjtë tregojnë interesim të madh për ta ruajtur gjuhën, këngën dhe vallet tona tradicionale, si dhe për t’i respektuar vlerat tona kombëtare.
5. Cilat janë planet tuaja për të ardhmen?
Në të ardhmen synojmë ta vazhdojmë këtë ritëm pune dhe ta zgjerojmë bashkëpunimin me të gjitha ansamblet shqiptare në diasporë. Përveç prezantimeve në festat tona kombëtare, synojmë të marrim pjesë edhe në festivale ndërkombëtare, me qëllim që ta prezantojmë kulturën dhe traditën shqiptare sa më gjerë. Gjithashtu, dëshirojmë që këtë traditë ta transmetojmë edhe tek brezat e rinj të lindur këtu, në mënyrë që rrënjët tona të mos humbin kurrë.
Në përfundim të kësaj bisede, mbetet e qartë se puna dhe përkushtimi i Mustafë Avdiut përfaqësojnë një kontribut të çmuar për komunitetin shqiptar në Mynih. Përvoja e tij artistike, e fituar ndër vite në Ansamblin “Shota” në Prishtinë, po vazhdon të jetojë dhe të transmetohet tek brezat e rinj në diasporë. Përmes angazhimit të tij, shumë të rinj po njohin dhe po përjetojnë traditat tona në mënyrë të drejtpërdrejtë.
