Tiranë 12 nëntor 2025
Panairi i 28-të i librit është çelur sot në Pallatin e Kongreseve dhe do të jetë i hapur deri më 16 nëntor. Për 5 ditë me radhë të gjithë të pasionuar pas leximit do të gjejnë botimet më të reja.
Sllogani i përzgjedhur për edicionin e këtij viti është një shprehje e shkrimtarit Ismail Kadare: “Ndërgjegjja jonë ka nevojë për librat”.
Në ceremoninë e nisjes së këtij edicioni, kreu i Shoqatës së Botuesve Shqiptarë, Petrit Ymeri tha se sot kemi një letërsi shqipe që po jep vepra shumë të mira që mirëpriten nga lexuesit, teksa renditi edhe disa problematika.
“Botuesit kanë probleme të mëdha të punës me librin, duke filluar që nga pirateria digjitale dhe ajo në shtypshkrime, bibliotekat që janë në situatë katastrofike si dhe numri në rënie i librarive”, tha ai.
Ashtu si vitet e tjera, panairi do të ketë një kënd për biseda me shkrimtarë, përkthyes, botues e kritikë, në katin e dytë të Pallatit të Kongreseve ku është vendosur “Sofaja e librit”. Ceremonia e ndarjes së çmimeve të panairit do të mbahet në datën 15 nëntor.
